भारतीय विदेश मन्त्रालयले दोहोर्या यो: माल्दिभ्स भारतीय महासागर क्षेत्रमा भारतको मुख्य सामुद्रिक छिमेकी
माल्दिभ्सका राष्ट्रपति डा. मोहम्मद मुइज्जु ६ देखि १० अक्टोबर २०२४ सम्म भारतको राजकीय भ्रमणमा रहने भएका छन्। भारतको विदेश मन्त्रालयले अक्टोबर ४ मा यो भ्रमणको घोषणा गरेको हो। आफ्नो भ्रमणका क्रममा उनले नयाँ दिल्लीमा भारतका प्रधानमन्त्री नरेन्द्र मोदीसँग द्विपक्षीय, क्षेत्रीय, र अन्तर्राष्ट्रिय चासोका विषयमा छलफल गर्नेछन्। साथै, उनी भारतकी राष्ट्रपति द्रौपदी मुर्मुसँग पनि भेटघाट गर्नेछन्।

यस भ्रमणलाई भारत-माल्दिभ्सबीचको सम्बन्धलाई थप बलियो बनाउने अवसरको रूपमा हेरिएको छ, विशेष गरी समुद्री सुरक्षा क्षेत्रमा महत्त्वपूर्ण छिमेकी राष्ट्रसँगको सम्बन्धलाई सुदृढ बनाउने सन्दर्भमा। यो राष्ट्रपति मुइज्जुको भारतमा पहिलो द्विपक्षीय भ्रमण हुनेछ। यसअघि उनले २०२४ जुनमा प्रधानमन्त्री मोदी र मन्त्रिपरिषद्को सपथ ग्रहण समारोहमा सहभागी हुन नयाँ दिल्लीको भ्रमण गरेका थिए। उनी आफ्नो यो भ्रमणका क्रममा मुम्बई र बेंगलुरुमा व्यवसायिक कार्यक्रमहरूमा पनि सहभागी हुनेछन्।

भारतको विदेश मन्त्रालयले माल्दिभ्सलाई भारतीय महासागर क्षेत्र (आईओआर) मा भारतको प्रमुख समुद्री छिमेकीको रूपमा मान्यता दिएको र प्रधानमन्त्रीको ‘सागर’ (क्षेत्रीय सुरक्षा र सबैको विकास) तथा ‘छिमेकी पहिलो नीति’ मा विशेष स्थान रहेको पुनः स्मरण गराएको छ। यस भ्रमणले भारत र माल्दिभ्सबीचको द्विपक्षीय सहयोग र जनस्तरको सम्बन्धलाई अझै प्रगाढ बनाउने अपेक्षा गरिएको छ।

यो भ्रमण हालै भारतका विदेशमन्त्री एस जयशंकरले माल्दिभ्सको तीनदिने भ्रमण सम्पन्न गरेको एक महिनाभित्रै भइरहेको छ। जयशंकरको अगस्ट ९ देखि ११ सम्मको भ्रमणमा उनले माल्दिभ्सको विकास साझेदारी, रक्षा र समुद्री सहयोग, क्षमता निर्माण, आर्थिक र व्यापारिक सम्बन्धहरूमा उच्चस्तरीय द्विपक्षीय छलफल गरेका थिए।